نهار منكرب

عن امبارح

أسئل شي بالدنيا لما بتفيق الصبح منكرب وعرفان انو نهارك كللو راح يكون متل صباحك... منكرب

بتروح عالشغل بيكون مافي ضغط.. او بالأحرى مافي شغل.. بتتمنى لو انك ضليت بالفرشة ونمت ساعة زيادة

بتسوق بالشارع بيطلعلك كل عباقرة السواقة بالبلد بوشك، ولبين ما توصل على البيت بتكون زمرتللك شي خمستالاف زمور وسبيت شي 100 مسبة ولعنت شي 200 أب وكفرت شي 500 كفرية

بتوصل عالبيت لتشوف انو الوالدة (الله يعطيها العافية) طابخة أكلة ما بتحبها.. وهالشغلة مو بس اليوم.. هي الشغلة عم تصير لليوم الرابع على التوالي.. لك أمي ارحميني والله راح موت من الجوع

عندك دوام بمعهد بعد الضهر، أول حصة، بتلاقي الوالد أخد السيارة وطار فيها.. وبيتصل بعد شي نص ساعة (معليش حبيبتي.. خدي تكسي واربطي معو ليجي يرجعك عالبيت).. خدي تكسي.. شو سهلة هالكلمة

يعني اركبي مع شوفير هندي عبقري سواقة ما بيخللي حدا ما بيكسر عليه او يدوبل عليه، وبيسوق على 140 بشارع ال100 وبيضرب بريكات الله أعلم فيها، هادا غير اذا اخد وش لما بقللو ارجعلي عالسبعة.. بيصير مفكر حالو الشوفير الشخصي تبعي ولازم يرافقني بجميع تحركاتي

امرنا لألله.. منطلب التكسي.. ساعة لتجي التكسي... شوفير التكسي ما بيعرف الطريق.. يللا بكل الأحوال اتأخرت عن الصف..بوصل عالصف.. بعد ما يبلش بشي تلت ساعة وانا مسلوق بدني لأني بكره التأخير كره الجرب... خلص الصف.. رجعت على البيت
بيخلص النهار.. بتقول يللا خلص ما بقا شي يصير.. شو بدو يصير كمان؟؟

بحكي تليفون... بسمع خبرية حزينة كتير.. بتزيد النكربة

لا لسا ما خلص النهار.. لسا ما صارت 12

من زمان مؤمنة، وامبارح آمنت أكتر انو مسج صغيرة ممكن تدايق أروق شخص بالدنيا.. فما بالك بشخص منكرب
حتى لو كان هالشخص صديق عزيز وبيمون
حلفت الا اتفشش فيه

وبعتللو مسج بتدايق اكتر

واتدايق

وخبصتها

واتدايقت انا بالزيادة.. يا ربي خللي هالنهار يخلص بقا!!! ـ

حملت حالي ورحت لنام.. ومتل العادة... مافي نوم

سوري اذا وجعت راس حدا.. بس عنجد أوففففففف