حوار

امي تشاهد التلفاز و تحل الكلمات المتقاطعة في غرفة الجلوس
أتيتها من الغرفة المجاورة.. وجلست بجوارها

ـ ماما دايق خلقي
ـ عطيه لأختك الصغيرة
ـ مامي عم احكي جد
ـ طيب حطيلو سجاف وعرضيه

تحبطني الردود اللامباليه، فأمسك بالريموت كونترول لأغير المحطة، علّي اجد شيئا يستحق المشاهدة

ـ تركيه من ايدك عم اتفرج
ـ ماما عم تحللي كلمات متقاطعة
ـ عم قللك تركيه من ايدك
ـ حاضر

*برهة صمت*

ـ مامي.. دقتلي رفيقتي.. قال طالعين الشلة مشوار وعزموني اطلع معون
ـ مين؟
ـ يعني.. رفقاتي بتعرفيهون.. ليال ونادين و عالية
ـ لوين؟
ـ عالشوكليت بار بالمارينا
ـ مابقا في بيوت تشوفو بعض فيها؟
ـ يعني تغيير جو
ـ افتحي الدرج وخدي لوح شوكولا وعزميهون للبنات عالبيت وبلا هالفزلكة
ـ بس انا جعبالي اطلع
ـ سمعتيني وللا لأ؟
ـ طيب هي أخي بيطلع مع رفقاتو يعني اشمعنى؟
ـ اخوكي شب انتي بنت
*اقدم حجة واهية بالتاريخ*
ـ طيب هي رفقاتي وقرايبينا البنات بيطعلو مع رفقاتون.. شوفيها يعني؟؟
ـ نحنا ما دخلنا بالعالم.. علينا من حالنا
ـ يعني البنات عيب عليها اذا طلعت مشوار؟؟ كل البنات يللي بتطلع صايعات يعني؟؟ انو والله ما بيصير يكون في شي اسمو عيب عالبنت وما يكون عيب عالشب.. ليش هالتفرقة؟؟
ـ لا تجادليني! شي حلو والله! بدك تعمليني الصح من الغلط كمان؟؟ يللي بعمرك فتحو بيوت وصار عندون ولاد وعم يتعاملو مع بيت احمى.. وانتي مع اهلك ما عم تعرفي تتعاملي؟؟ هيك ربيناكي نحنا؟؟؟
ـ ما دخلني بالعالم
ـ نحنا مندور عالشي المنيح بالعالم مو عالشي العاطل ومنتفرج عليه... مندور على القدوة الحسنة
ـ بس انا ما عم اعمل شي غلط
ـ لعيتيلي قلبيي !!! وحياة المنصوبة اذا ما بتسكري هالسيرة لاخبطك بيللي بايدي
ـ طيب طيب امرك

*برهة صمت اخرى*
ـ طيب مامي والله دايق خلقي وجعبالي اطلع من البيت
ـ ماشي ولا يهمك.. بدي شوية غراض من السوبر ماركت هلأ انا وياكي مننزل منجيبون اسمو ابوكي تركلك السيارة

*تمت*