دمعة

البكاء شيء اساسي بالحياة بالرغم من انو في كتير ناس ما بتقدرو وبتعتبرو نوع من الضعف. الضعفي يللي بيواجه الانسان لما بيحس حالو عاجز او فارغ.

الواحد منا ممكن يكابر على دمعة اكتر ما يكابر على وجع او الم
بتلاقينا شاطرين بالسق والنق كتير، بس لما الموضوع بيتعلق بالبكاء.. كلنا منكون شجعان، والواحد بيفضل يقولو عنو انو دمعتو عزيزة او شخصيتو قوية او قلبو قاسي بس ما يقولو عنو حساس او رقيق او دمعتو سخية

الدمعة دليل جبن بمجتمعنا

ليش لحتى ما نبكي؟
مع انو البكا بيطري القلب وبيغسل الروح

منبكي من موقف انساني او من حزن اصابنا او من شوية تذلل وخشوع للذات الالهية يللي منعبدها او من شوقنا لأهلنا القريبيين او من صدمتنا لخيانة صديق عزيز او من شعورنا بالقهر بالوحدة بالتعاسة

نبكي من الضعف

اذا بكينا كذا مرة بعمرنا
حالة اكتئاب عامة
ليش بتكون اخر مرة اكتر مرة مزعجة؟؟
اكيد مو بسبب موقفها، لأن لما منبلش بالبكاء بتصير كل كل المواقف البشعة عم تنسرد براسنا كأنك بقاعة سينما ومقيد بالكرسي ومافينك تغادر لحتى تشوف فيلم الرعب الشخصي.. فيلم من حياتك، من تجاربك، من اخطائك، ومن ابتلاءات الزمن عليك. فيلم بيشجعنا على الانجراف. دمعة ورا دمعة لحتى نتنهنه

بس شو بيخللي هالمرة الاخيرة مرة مزعجة؟؟
لأن حدا بمرقة طريقو بيشوفك بالصدفة بخلوتك مع نفسك، بلحظتك الخاصة القدسية
بيشوف دمعتك
بيكشف سرك
انت رقيق
وما راح يتركك لحتى تحكي، واذا انت بديت بالحكي ما راح توقف، بس بنفس الوقت ما بدك تحكي
بيكفي اول سر انفضح.. الله يستر على باقي الاسرار
ليش هو مصرّ يعرف؟؟ هو وفي وبدو يساعد او هو خبيث وبدو يشمت فيك

انت بكل الاحوال ما راح تحكي

وراح تقطع على حالك وعد بأنك تركب جلدة جديدة اصلية لحنفية دموعك ما تنهرى مع هالزمن اللئيم، وتحط قلبك بصندوق وتسكر عليه

وما ضروري حدا يشوف هالدمعة