فخورة لأنو

الفكرة ملطوشة من الغرفة الاجتماعية... تحية لصديقي صاحب الموضوع
(اهلين فيك... بعرفك شو راح تقول فعم رد عليك دغري)
*sleep*

شغلات بتخليني اشعر بالفخر... بشكل عام الها علاقة بوطني

فخورة لأني من بلد اسمها سوريا ومن اقدم مدينة بالتاريخ... دمشق

فخورة لأن بسوريا بتنتقل الاخبار بسرعة البرق واكتر ناس بيستعملو بهارات بالحكي هنن السوريين
هادا غير فاعلين الخير طبعا

فخورة انو سوريا بتحن عالمساكين مع انو بدها مين يحن عليها

فخورة انو سوق الحميدية مقصد سياحي مهم في دمشق

فخورة لانو صار عنا محلات مانجو و بيير كردان و جيورجيو ارماني بالشام و 90 بالمية من السكان بيقدرو بكل بساطة انو يفوتو عليهون و يشمو....و يطلعو (ملطوشة) ـ

فخورة لأن الكبير والصغير والمأمط بالسرير بيعرفو شو الدوا الشافي لكل الظواهر والانسدادات المستعصية ببلدنا... الا وهو العملة

فخورة لأن المواطن بيعرف يتفاهم مع الموظف والموظف بيعرف يتفهم مع المدير والشوفير مع الشرطي والطالب مع الانسة والطالبة مع
دكتور الجامعة
فخورة لأن شعبنا بيحب الفرفشة والنعنشة مع انو معتر كتير وقلبو مليان هموم

فخورة لأن عنا ذهب ابيض وسنابل ذهبية و فيجة

فخورة إنو المسلسلات السورية أحلى مسلسلات بالوطن العربي في الوقت الحالي (ملطوشة) ـ

فخورة لأن جمال سليمان سوري

فخورة انو ماحدا بيساوي ستي زبئي وكباب هندي وحراء اصبعو وفلافل بنشارة خشب غيرنا

فخورة لأن وأخيرا غيرو بألوان العملة المعدنية مشات يللي نظرو على قدو يعرف العشرة من الخمسة باللون

فخورة انو حيصير عنا بورصة سوق اسهم مالية

فخورة لأن شعبنا اكتر شعب مفتأ بالعالم

فخورة لانو كل شعبنا فهمان بالدين و السياسة و الاقتصاد و العمارة و الهندسة و الطب و الشعر و الفضاء و الموسيقى و النحت...على ذمتو طبعا (ملطوشة) ـ

فخورة لأن السوريين مسبعين الكارات

فخورة لأن كل الناس بتحسب الف حساب قبل ما تفكر تنصب على واحد سوري

فخورة انو طبيعة بلادنا حلوة و لساتها عذراء من قلة الاهتمام و الفشل بالقطاع السياحي (ملطوشة) ـ

فخورة لأن لسا ماوصل الزحف العمراني الى صحراء تدمر

فخورة انو شعبنا ما بيكره شعب تاني بالولادة (ملطوشة) ـ

فخورة انو السوريين اكتر ناس بيآمنو بالفزلكات متل الاحكام المسبقة ونظريات المؤامرة

فخورة انو الطيران العربي السوري عندو طيارين على مستوى عالي واسوأ اسطول طيارات

فخورة لأن كل السوريين سواسية و صورهون بهوياتهون كأنهون مطلوبين حيا او ميتا

فخورة لأن هويتي القديمة مو مبخوشة (ملطوشة) مع اني ما بعرف شو يعني انو مبخوشة بس هويتي ما كانت مبخوشة و معناتا هي شغلة منيحة(مااااع) ـ

فخورة لأن ماعندي بطاقة انتخابية

فخورةلانو البنت السورية اكتر بنت بتعتني بحالها من بين كل الجنسيات يلي عرفتهون (ملطوشة لأن كتير عجبتني) ـ
*smug*

فخورة انو سوريا فيها اطيب كنتاكي بالعالم....اسمو فروج بروستد (ملطوشة) ـ

فخورة انو بسوريا في جامعين امويين مو بس واحد

انا فخورة لأن السوريين بايعين الدنيا بقشرة بصلة ومافي حدا بيعلق على صرمايتون

فخورة لأن السوريين بيلاقو الشي الحلو من كل شي... يعني حتى لما الواحد بيسمن بيقولو صار عندو كرش للوجاهة

فخورة لأن صار اسم سوريا متطرق عالتلفزيون متل اسم غانا يعني كتير من المتفرجين بيعرفو بوجود هيك دولة (ملطوشة) ـ

فخورة انو عنا احلى امفيثيتر اثري بالعالم

فخورة انو عند السوريين طلوع النهار يمحو كلام الليل

فخورة انو ساحة الامويين صارلها 3 سنين مدري اكتر ماعاد اتذكر عم تتساوى بالنفق تبعها ولهلأ ما كانت تخلص مدري خلصت وما درينا

فخورة لانو السوريين بعلكو كتير....قسم بيعرف شو عم يعلك...و قسم بيعلك المهم انو علك (ملطوشة) ـ

فخورة ان البنت السورية لما بتطلع من البيت بتحسب حساب فاعلين الخير اكتر ما تحسب حساب اذا ممكن حدا يأذيها

فخورة انو بضل سهرانة بالزايد نص ساعة على موضوع بس مشان قول قديش انا فخورة


ومتل ما قال الشعب
ريتو فخور يكسر بعضو