نحنا واوبراه - Oprah and us

صارلي زمان ما بلوغيت

يمكن خلص الحكي

مع انو غريبة.. لأنو انا عربية وكتر الحكي واللعي بطعمة وبلا طعمة من سمات العرب

وخصوووصي بظروف متل هلأ

يللا متل بعضا

المهم

قال على محطات الام بي سي عم يطلع اعلان ليحث العالم لتبعت مسجات اس ام اس لحتى تربح رحلة على امريكا لتحضر حلقة من برنامج اوبراه وينفري

انو متل العادة.. نصب وضحك على اللحى مشان يستغللو العرب الملانين لحتى تربح شركات الموبايلاتبس انو العرب شو بدهون من اوبراه وينفري لحتى تكون لحدا منهم امنية يحضرولها حلقة من برنامجها؟

هلأ معروف انها شخصية اعلامية متحدثة وذات حضور وانو الها تأثير على الشعب الأمريكي.. وبتطرح مواضيع مفصلة على قياسهون الفضفاض

في مرة حضرت حلقة عن التعميم يللي بيصير بأمريكا.. واستضافت سيدة من عائلة امريكية مسلمة (امريكية اصلية وليست امريكية مهاجرة).. وحكتلها كيف عم يعانو نفسيا من التعميم خصوصي بعد أحداث 11 سبتمبر.. بتوقع انو هيك لقاء لاقى صدى ظريف بأمريكا وكان منيح للعرب والمسلمين هنيك.. بس بالنسبة النا بالوطن العربي.. شو قدملنا؟؟

من وقت ما فاتت اوبراه على بيوتنا العربية الشرق اوسطية.. شو قدمتلنا كأفراد او كمجتمع؟حدا غيرتلو اوبراه بحياتو شي؟

يا ترى هدول الأربعة بس راح يقعدو هيك بالصف الأول ويتأملو طلتها البهية وللا راح تفوتهون على "الغرفة الخضراء" تبعها ويتسامرو سوا ويتبادلو اطراف الحديث؟

سؤالين:ـ

الأول: لو انته التقيت بأوبراه (وخصوصا في ظل الظروف الراهنة) لتطلب منها شي بيخصنا كعرب، شو راح تطلب منها

الثاني: ليش لحتى ما يكون عنا اوبراه عربية؟

-------------------------------

So the ads have been running on the mbcs.. in and out..
"four Arabs will get to go to the USA to be amongst the audience of an Oprah Winfrey show! SMS now to these numbers!!"

So why would Arabs want to go to the Oprah show? is it because she is a good host? a good speaker? an influential person? an important figure?

I understand all of the above reasons. but I can't see how those reasons relate to us to the point of making an Arab want to meet her. It's true that she is influential and that she brings up important topics, but most of these topics work out in the US and only in the US.

I saw a show once where she was fighting stereotyping, and she talked about a Muslim American family and how much they were emotionally abused after September 11th because of stereotyping. It must have had an impact on many people in the US, but how does this serve us as Arabs in the Middle East?

Given the current circumstances in the Middle East, If you got the chance to meet Oprah Winfrey and ask her to use her magic to do something for us, what would it be?

Another question; how come we don't get to have an Arab Oprah?

ازعاج

ما بعرف شو بيخطر ببال الأهل يللي بيعملو لأولادهون الصغار عيد ميلاد بمطعم
مو انو مطعم فيو العاب برا.. او بيجي فيه الساحر وبيعمللون استعراض.. او فيو بنت بتلون الوجوه للاولاد الصغار
لأ.. مطعم الجو تبعو لناس كبار
بيضوجوا الاولاد المعازيم.. لأن مافي شي يساووه غير انو يركضو بين الزلم وبين الطاولات.. وبيصيروا بيعيطو وبيزعجوا العالم
بعدين لما يجي الفرج متمثلا بقالب الكاتو.. بيخلو الولد صاحب عيد الميلاد يللي عمرو بس سنتين يوقف عالكرسي.. والكراسين عم تغنيلو هاااابي بيييييرثدااي.. وهو مو فهمان ولا كلمة.. وخايف ومرعوب.. والاولاد التانية لساتا عم تعيط.. والناس اللي بالمطعم عم تطلع فيهون.. انو وبعدين؟؟؟
والولد ابو عيد ميلاد مو فهمان شي

يا ترى بس ليكبر الولد ويشوف شريط الفيديو تبع عيد ميلادو الثاني شو راح يقول؟

مجتمع

مجتمع من الناس عم يتناقشو بأمور سياسية اجتماعية اقتصادية وبيئية
بيصدف واحد من المجتمعين افكاروا خارجة عن المألوف.. ايجابي بطريقتها الخاصة
لسا ما بيلحق يفتح تمو.. بيطلعولو سنجق عرض.. وبيساوو شغلة بيئة وكيس زبالة.. لأنو مختلف

الأول: ولك انته ما بتهمك مصلحة البلد.. ولك انته غلط.. ولك انته بدك تضرنا
التاني: ايه عطيه.. خليه يعرف
الأول: ولك انته لو مو مصلحجي ما بتورجينا خلقتك ولا بتفتح تمك.. ولك انته علاك
التاني: ايه سمعو لهالكر
الأول: ولك انته لو مافي بنات بالقعدة ما بتقعد (وينظر بطرف عينه للبنت يللي قاعدة جنب اللي نازل فيه.. انو بالله ما عجبتك؟؟).. ما بتفهم بفرنكين وجاية تبيض على قفانا.. روح شوف حالك احسنلك من هاللعي
التاني: ايه الله يعطيك العافية خليك عم تبع** ـ
الأول للتاني: اهلين الله يسلمك يا رب... ايه وين كنت؟؟
ايه.. ولك انته ما بتهمك مصلحة البلد.. ولك انته غلط.. ولك انته ما بتفيدنا
التاني: لك صفقولو صفقولو.. هادا الحكي
الأول: شكرا شكرا
ايه وين صرت؟ ايه.. ولك انته لو مو مصلحجي ما بتورجينا خلقتك ولا بتفتح تمك.. ولك انته علاك
التاني: ولك وين الفرد وينو بشرفك وينو؟؟بدي قوصلك هلأ هلأ!! يقبرني الله اللي خلقك
الأول يللي صار راسو قد الطبل: ولك انته صرصور.. وبدي اسحقك
التاني: لك انا بطيرلك ياه معلم.. بأمر شواربك انا

وتفتتح الدبكة بنغمات شعبية.. ويستلم اللقلوق الراس.. وياريتو بيكون بهاللحظة عرفان حالو أديشو حشرة
بينما يقف اللقلوق الأكبر منو مختالا.. انو انا كسار راسو.. وياريتو بيكون بهاللحظة عرفان حالو اديش مدود وبهيم

دعاء الحكام العرب

i received this to my email today.. I thought I would share it

اللهم زِد من جلوسنا على كراسينا

وبارك لنا فيه

اواجعلها للوارث من

اواجعل ثأرنا على شعبن

اوانصرنا على من عارضنا

ولا تجعل مصيبتنا في حُكمنا

ولا تجعل راحة الشعب أكبر همنا

. ولا مبلغ عِلمنا

ولا الانقلاب العسكري مصيرنا

واجعل القصر الرئاسي هو دارنا

اللهم إنا نسألك فترة ممتدة

وهجمة مُرتدة

والصبر على المعارضة

والنصر على الشعب

اللهم ارزقنا معونة لا نسرق بعدها أبدا

اللهم لا تفتح أبواب خزائننا لغيرنا

اللهم وفق أمريكا لما فيه خيرن

االلهم اغفر لـ (جورج بوش) فإنه لا يعلم أننا لا نعلم

اللهم وفقه لما فيه 99% في المائة من أصوات الناخبين

اللهم اقذف حُبه في قلوب اللوبي الصهيوني كالجلطة

اللهم لا تُحاسبه من أول غلطة

اللهم عليك بشعبي، أما أعدائي فأنا سأتفاوض معهم

اللهم طيّب جمرتي وخبّث جمرة شعبي

اللهم ارزقنا حب أمريكا

وحب من يُحب أمريكا

وحب ما يُقربنا إلى حب أمريك

االلهم أمركني ولا تأفغني

اللهم برطني ولا تصوملني

اللهم فرنسني ولا تسودني

اللهم أني أبرأ من الاستعانة في حكم شعبي بأحد

ولا حتى بصديق، ولا برأي الجمهور

ا

للهم أني أعوذ بك من كرسي يُخلع

ومن شعب لا يُقمع

ومن صحيفة لا تُمنع

ومن خطاب لا يُسمع

ومن مواطن لا يُخدع

وأعوذ بك من كل عمل يُقربني إليك!

اللهم لا ( تكنسل ) دعاءن

اولا (تهنجنا) ثم تُعيد تشغيلنا

ولا ترفعنا من الخدمة أبد الآبدين

يا أرحم الراحمين يا رب.

وليدة عام 1948

خبرين امبارح سمعتهم، خلوني حس كيف العالم عم ينغسل دماغو شوي شوي

أول خبر كان: انتحاري يفجر نفسه في مجلس شيعي للعزاء

يعني انو بدي افهم، شو عقلو هاد الزلمة يللي بيروح على مجلس عزاء، الناس فيه حزانى،، وفوق منها آمنين، يعني لا هنن بالشارع ولا بمسجد (هي قصة تانية، ما عاد حدا يسترجي يروح على مسجد) ، باسم شو راح يفجر نفسو؟؟ لأ وبحزام ناسف كمان

أحلى شي بالخبر انو شاهد عيان عم يقول :ـ
"الانفجار جاء من وسط الخيمة. لقد قتل كثيرون. كان هناك دخان كثيف والجثث في كل مكان. سادت حالة فوضى كاملة."

دخان كثيف وفوضى وجثث، مين لحق يشوف ويقر ويعترف بعد هالصدمة انو ايه والله كان في واحد رابط حالو بحزام ناسف وفجر الدنيا!!ـ

كأنو صارت شغلة بديهية انو أي تفجير بالعراق هو أكيد لا محالة عبارة عن عملية انتحارية.. وراها سؤال: ايمتا راح تكون الضربة المعاكسة لأخذ الثأر.. حاكم نحنا عرب.. من جماعة التااااار ولا العاااار

أنو أهم شي أنو صارو يلقمونا الخبر بالمعلقة.. ومع مرارتو، ومع رفضنا الو، ومع انو منعرف انو 90% منو عبارة عن سلبة بكل معنى الكلمة، منهز براسنا.. ومنقللون.. طييييبة!!ـ

العلة انو صرنا سامعين هالخبر مدري كم ألف مرة.. من جوا كلنا منعرف انو ما مزبوط.. بس اعلامنا الببغائي متل الشاطرين بيروحو بينقلو الخبر متل ما لقموه ياهون

يا اعلام.. ما سمعتو بشي اسمو الأمانة؟؟

ايه.. انا برفض اني اعترف انو العراقيين هنن يللي عم ينفذوا العمليات الانتحارية ضد المدنيين وعم يحرضو على النزعات الطائفية.. وبآمن انو جيش التحالف هنن يللي عم يحركوا الفتنة

وأنا هيك عم سمي الأشياء بمسمياتها.. واني قول او وافق انو يللي عم يصير هو بداية الحرب الأهلية، هون أول خيط الاستسلام.. وهون منقول لأمريكا وللتحالف.. معليش خلوكون عنا نحنا ما منسوا شي بلاكون يا جماعة الخير

كتير ممكن يشوفها نظرية مؤامرة.. بس على فكرة، نحنا العرب كنا أول معطيات هالنظرية

الخبر التاني بيقول: "السجن المؤبد لخمسة مسلمين بريطانيين متهمين بالارهاب" ـ

أهم شي بالخبر هو طريقة صياغتو. لو مثلا كانو هدول المتهمين بالارهاب يهود (ايه سوري بللشت خربط) قصدي سيخ أو كنفوشيين أو حتى وجوديين.. هل كانت راح تنذكر ديانتهون؟؟

لو ما كانو مسلمين كان خبر المحاكمة ما انحكى، وكانوا أصلا حاكموهم بتهم جرمية بدال ما يفصلولها كلمة "الارهاب" على قياسون
شو ما كانوا عاملين هالخمسة.. ارهابيين ولا مانون ارهابيين، لساتهون ناس.. وبتخيل انو هالشي اسمو تمييز عنصر بحت

مافيني أبدا اعتب على الاعلام الأجنبي انو نقل الحدث بهالصورة.. ما نحنا الحمدلله، صارلنا من 11 ايلول الألفين وواحد ملزوقة بضهرنا هالتهمة، والأحلى من هيك انو ما عم ننفيها عن حالنا، بالعكس عم نزيدها، والأحليين لسا انو كل ما حدا بيحاول يعمل شي منيح، بينحطللو عصي بالدواليب، ولسا التلات أحلايات أنو الاعلام العربي يللي المفروض انو عم يمثلنا عم ينقل الخبر متل ما عم يتلقمو من يللي فوقو

لأنو ببساطة اعلام فاسد

أولا وأخيرا.. الحق علينا... حابين كتير الملح المكبوس على جرحنا... السكوت والهدوء والصمت عم يساعدنا بتطوير حالة التمسحة

الفكرة واضحة وقديمة كتير.. انولدت بسنة 1948.. حتى من قبل.. من ايام سايكس بيكو ووعد بلفور "المشؤوم".. وعمرها مافي الا عم يزيد يا سواد وشنا من الأجيال يللي راح تجي بعدنا

بس ما قدرت ما فش خلقي

ما بعرف اذا تاريخنا راح يسود أكتر من هيك.. والأظرف من هيك انو ما بيطلعلنا نكتبو

يا أخي وبلا ما نكتبه.. لو كتبناه راح يطلع تلات ارباعو كذب بكذب
حاكم ماحدا بيقول عن زيتو عكر